Fest des Fastenbrechens

S Fescht vum Faschtebräche oder ʿĪd al-Fitr (arabisch عيد الفطر‎, DMG ʿĪd al-Fiṭr) isch en islamisch Fescht im Aaschluss an dr Faschtemonet Ramadan in dr erschte zwee bis vier Däg vum Noofolgmonet Schauwāl. Je no Land un Region git s Unterschid in dr Duur un Art vum Fescht. Hegschtpunkt vum Fescht isch dr erscht Dag, wu mit dr Sichtig vum erscht Mondliecht noch em lääre Mond aafangt. Im Dirkisch haißt s Fescht Ramazan Bayramı („Ramadan-Fescht“) oder Şeker Bayramı („Zuckerfescht“), im malaiische Sproochruum Hari Raya Aidilfitri („Große Dag vum Faschtebräche“) oder Hari Raya Puasa („Große Dag noch em Faschte“). S Fescht wird mit dr Familie gfyyrt. S Fescht fangt aa mit em Feschtgebät (ṣalāt al-ʿīd), wu in ere Moschee oder im Freie bätet wird. Derno goot mer haim un fyyrt mit dr Familie. S git e Hufe Sießes zum Ässe un Gschänk. In islamische Länder sin d Schuele, Universitete un Ämter zue an dr Feschtdäg, au di maischte Gschäft hän zue.